Biskutchikos-Rechikas
Biskutchikos II o Rechikas
Yay mil i un maneras de azer biskutchikos, yo tengo 3 reseftas. Kada una viyene de una tia de mi madre. Ya vos aviya dado la resefta de la tia Sara , ke puedesh meldar de muevo aki, oy es la resefta de la tia Rashel. Este anyo las azimos para Yom Kippour para kortar el tanit, kon keso es una maraviya
Ingredientes
-125 g manteka blanda
-2 findjanes de alzete
-2 findjanes de agua
-una kupa de asukar
-1/2 paketo de baking powder
-arina
-susam (sesame)
-1 guevo
Preparamiyento
-Mesklar la manteka blanda kon l’asukar para azer komo una krema
-Adjsutar alzete i mesklar bueno, azer de mizmo kon la agua.
-Adjustar la arina i el baking para azer una masa no muy dura
-Dar forma
-Untar kon un guevo bateado i meter ‘susam’ enriva
-Meter al orno
-Se puedi guadrar en un kuti (komo tupperware) 2 semanas o mas
posted by sarah | 1:41 PM
8 Comments:
Y a mi tambien me gusto comer con keso, Sarika.
kerida Tata,
kon keso blanko es lo ke me agrada el mas:)
kon cay o una kupa de leche? :)
sarah
Kerida Sarah,
In los ingredientis estaz diziendo, dos fincaniz, ez fincaniz di kafe u fincaniz di çay? Te abrasu, Ayfer
Kerida Ayfer,
tienes razon de demandar, es fincan de kafe turko. espero ke te va agradar,
besos
sarah
Querida Sarita,
Feliz Cumpleaños!!!!!!!!!!!!!!!
Besos
Elías Narciso
Kerida Sarah,
Ayer izi los biscochikos, me se izyeron muy savrozoz. Mersi. Te abrasu, Ayfer
Kerido Narci,
Mersi muncho de pensar a mi,
Kerida Ayfer,
es un grande plazer de ver ke ay personas ke azen las reseftas,
Besos a todos
sarah
Kerido David,
Tiyenes razon kon kafe turko es muy ermozo tambien, mi madre da biskotchikos kon el kafe:)
saludos
sarah
Post a Comment
Subscribe to Post Comments [Atom]
<< Home