Rulo de berenjena

Rulo de berenjena ( para 2-3 personas)

Ingredientes 
una berenjena
un guevo
100 g de carne molida
sal
pimyenta
une revanada de pan

tomates
pimenton
2 kucaras de asukar
agua

Preparamiyento

-Mundar la berenjena como un pijama
-Cortar la berenjena  i meter en la agua kon sal medya ora
-Despues esprimir las revanadas de  berenjena , pasarlas en el guevo bateado i meter à freir en l'alzete.
-En un plato, mesklar la carne molida, un poko de sal, pimyenta, el pan mojado i esprimado. Mesklar komo azer kofte
-Tomar un pedaso de berenjena frita, meter una kofte i azer rulo
-Meter en una kacarola ( el mijor es un plato komo un plato de paella / risotto ...)
-Meter los rulos de berenjena en este plato, adjustar tomates raida, pimenton kortado un muy chikito pedasos, asukar.
-Adjustar agua i meter à kozer fina que no ay maz agua

Kon beraha i salud

Fideos

Keridos amigos, 

La semana ke paso fue una semana maraviyosa, porke estava en Paris la segunda Universita del ladino. Ya komimos, bivimos i gizamos endjuntos. Me akodre ke teniya de kontinuar a gizar para eskrivir aki ... Ke no se olviden muestras memorias, savores :) 

Este anyo me fue pour la primera ves en mi vida en Espagna, i komi Fideua ...i teniya el gusto de los fideos de mi mama

Aki es la resefta

Fideos

 Ingredientes (4 personnas)
-2 kupas de fideo
-3 kucharas de alzete
-1 kuchara de tomatada
-4 kupas de agua
-Sal

Preparamiyento

-En una kacharola, freir los fideos kon l'alzete fina ke seyan dorados
-Mesklar kon la tomatada
-Adjustar kon los 4 kupas de agua kente
-Meter sal i meter a kozer fina ke no keda mas agua
-mesklar, dechar reposar unos kuantos minutos

Bon appétit

Tishpishti :)

Este anyo me ambezi la resefta de tishpishti, ke es una maraviya
No puedo dar la resefta, vo a demandar si puedo vos dar la

Fina ke la resefta viyene vos dezeyo una anyada buena kon paz i salud

Besos

Shana Tova

Anyada buena a todos, ke seyga dulse i kon salud

Shana Tova

Beraha de komida

Keridos amigos,

Estamos avlando de komida, ma anda esta la beraha? Despues de komer, mi papu dize esta beraha,

"Ya komimos, ya bivimos
i al Dyo ya bendichimos
Ke mos dyo pan para komer
Agua para bever
Anyos para bivir
Panyos para vistir
Hodu LaShem ki tov
Ki L'olam chasdo
Siempre mejor
i nunka peyor"

Arroz kon tomat

Keridos amigos,

Despues de tanto tiempo es un plazer de ser de muevo kon vosotros,

El enverano esta vinyendo, vamos a topar munchos tomates, va ser muy fasil de azer esta resefta ke es muy savroza, de verda :)






Ingredientes
-2 kupas de arroz
-2 kupas de agua
-2 tomates
-manteka / alzete
-sal

Preparamiyento

-Meter el arroz en agua no muy kente, deshar reposar medya ora
-Lavar muy bueno el arroz
-En una kacharola meter la alzete kon la manteka a freir, adjustar el arroz fina ke se aze transparente
-Adjustar dos kupas de agua kente, i sal.
-Kitar las kashkas de los tomates, los kortar en 5-6 pedasos, los adjustar al arroz (SIN MESKLAR, el arroz deve ser BLANKO) kuando la agua esta buyendo. Abashar el fuego i meter un "kapak" fina ke es pronto
-deshar reposar 15 mn
-Komer pishin

Sarah

Pechkado de tierra

Mi papu konta muy savrosas istoryas. Kon mi ermana mos agradava muncho las istoryas de kuando mi papu era manseviko, a la skola, kon sus amigos …. Ma agora lo ke me agrada muncho son los rekuerdos de komida. Este anyo, mos konto komo kuando no aviya peshkado a komer, aziyan berenjenas fritas, ma ke los yamavan pechkado de tierra :) Me agrado tanto ke vos meto aki la resefta .

Besos i Anyada Buena

Pechkado de tierra

Ingredientes

1 Berenjena

1 guevo

1 kuchara de supa de arina

Alzete para freir

Preparamiyento

Mundar la berenjena i kortar en tejadas. Meter a reposar en agua kon sal.

Despues una ora, esprimir las tejadas de berenjena i l’asekar kon un trapo.

En un plato, batear un guevo. En un otro plato, meter la arina.

Untar las tejadas de berenjena, una vez en la arina i despues en el guevo.

En una tava, meter la alzete a freir. Kuando se kenta, meter a freir las tejadas de berenjena.

Kualo dizir mas, se puede komer kon vinagre

Beraha i salud