Savores de siempre

Pechkado de tierra

2010-01-03T12:25:00.000-08:00

Mi papu konta muy savrosas istoryas. Kon mi ermana mos agradava muncho las istoryas de kuando mi papu era manseviko, a la skola, kon sus amigos …. Ma agora lo ke me agrada muncho son los rekuerdos de komida. Este anyo, mos konto komo kuando no aviya peshkado a komer, aziyan berenjenas fritas, ma ke los yamavan pechkado de tierra :) Me agrado tanto ke vos meto aki la resefta .

Besos i Anyada Buena

Pechkado de tierra

Ingredientes

1 Berenjena

1 guevo

1 kuchara de supa de arina

Alzete para freir

Preparamiyento

Mundar la berenjena i kortar en tejadas. Meter a reposar en agua kon sal.

Despues una ora, esprimir las tejadas de berenjena i l’asekar kon un trapo.

En un plato, batear un guevo. En un otro plato, meter la arina.

Untar las tejadas de berenjena, una vez en la arina i despues en el guevo.

En una tava, meter la alzete a freir. Kuando se kenta, meter a freir las tejadas de berenjena.

Kualo dizir mas, se puede komer kon vinagre

Beraha i salud

Kaldo godro

2009-05-10T13:08:00.000-07:00

Oy me fui a vijitar amigos ke azen muy bueno a komer. Komimos revani, tispishti , sutlac…. Humm estava una maraviya. Depues de esto no puedi komer muncho, azimos una koza muy fasil i livyano. Espero ke vos va agradar

Kaldo Godro (para 3 personas)

Ingredientes

3 kucharas de supa de arina

3 cupas de agua

un poko de tomatada

sal

kezo duro (halloumi, tulum…)

alzete

Preparamiyento

Mesclar la arina i la agua en un ‘bol’ fina ke no se ve ke ay arina

En un tendjere meter un poko de alzete i freir el keso.

Adjustar la agua kon arina i la tomatada. Mesklar fina ke se espesa

Si es muy espeso, se adjusta un poko de agua yelada.

Komer pishin

Buen provecho :)

Trigo

2009-02-08T06:49:00.001-08:00

Keridos amigos,
Los ke konosen el "Asure" de los turkos no van estar enkantado de esta resefta. Esto se da en los Djidyos de Izmir solo para la fiesta de Tu Bishvat ke yamamos "Frutas".
A mi me agrada muncho, espero ke vos vas agradar tanbien,

Trigo

Ingredientes

- 1 cupa de trigo (yo uso trigo "Ebly" ke son kosidos)

- 10 cupas de agua

- 1/2 cupa de asukar (mas o menos)

- 1 kuchara de miel

- 1 cupa de uvas sekas

- 1 cupa de muez

Preparamiyento

- Si el trigo no se merka kosido pronto, se mete en mojo una noche antes.

- Vaziyar la agua la demaniana, i meter a kozer.

- Echar esta primera agua.

- Meter las 10 cupas de agua i meter de muevo a kozer fina ke el trigo se ablanda muncho.

- Adustar las uvas. Kozer un poko mas.

- Abatar el fuego, i adjustar el miel i la asukar .

-Mesklar un poko.

- Se kome kon muez i un poko kente.

Anyada Buena

2009-01-01T13:34:00.000-08:00

Vos dezeyo a todos una anyada buena kon amor, paz i salud i como diziya mi tiya Julia 'Eskritas buenas' à todos .

Kuchunduria

2008-10-19T12:30:00.000-07:00

Oy vos meto una recheta ke es un « classique » en muestra kaza. Fina agora keriya darvos recheta kon mesuras djustas. Oy las mesuras son djustas komo las rechetas de muestras gramama « un puko.. un poko …» :)
Para kuchunduria puedesh sintir « pancar » ke es el biervo turko, ke se uza muncho. Espero ke vos va agradar.

Kuchunduria

Ingredientes

Kuchundurias
1 findjan de vinagre
3 findjan de agua
2 kucharas de supa de asukar
1 puko de sal

Preparamiyento

En Fransa las kuchundurias se venden kozidas i mundadas en paketo de 3 (medio kilo). Si las merkaj krudas, devej kozerlas.
Rayer o kortar las kuchundurias kozidas en una bocha
Adjustar el vinagre, la agua, el sal i la asukar. Devej meter bastante agua+vinagre para kuvijar los pedasos de kuchundurias.
Mesklar bueno, meter en el « frigidaire »

Kon beraha i salud

Boyos

2008-08-10T12:53:00.000-07:00

Oy esto metiyendo una recheta ke me agrada muncho, es la recheta de boyos. Es una recheta ke aziyan antes solamente los djidyos de Izmir i de las sivdad serkas de Izmir. Es tanto classico ke los boyoz se vienden oy en las cayes en Izmir. La unika diffrensyia es ke los muestros son kon pure. En Turkiya se agrada komer boyos kon guevos haminados i « çay ».

Kon beraha i salud :)

Boyos

Ingredientes

Para la masa :

1 cupa de agua
1 kuchara de supa de alzete
1 kuchara de supa de sumo de limon
un poko de sal
arina

Para el gomo :

5-6 patatas
2 guevos
sal
100 g kezo (tulum o feta en Turkiya)

Preparamiyento

En primero se apronta el gomo

Kozer las patatas fina ke se ablandan
Ahajar las patatas para azer una pure
Adjustar los guevos, la sal i el kezo. Mesklar bueno

Para la masa:

Mesklar l’agua, la sal, el sumo de limon i la alzete.
Ajsutar la arina fina ke se aze una masa no muy dura, la masar bueno.
Azer pedasos de masa (grande como una mues)
Meter alzete kon la mano en un tepsi (plateau en fransez) i meter los pedasos de masa enriva
Dechar reposar los pedasos 1 ora

Azer los boyos (la parte la mas dura)

En un plato, meter 100 – 150 mL de alzete
Tomar un pedaso de masa, echarlo en la alzete i o kitar pishin
Avrir la masa kon las manos, para azerla fina komo una tela de sevoya
Duvlar la masa de los quatro cantones para azer un kare
En medyo del kare se mete un poko de gomo, i se duvla kom un bollo.
Meter los boyos en un tifsin untado de alzete, pasar un poko de alzete enriva de los boyos. Meter un poko de kezo rayido enriva de los boyos
Gizar los boyos en el orno kente

Boyos

2008-08-02T13:30:00.000-07:00

Keresh la resefta? :D

Albondigas de Matzo

2008-04-20T11:46:00.000-07:00

Keridos amigos,

Antes de empesar Pesah alegre a todos.

Puedemos dizir ke despues de un anyo ke me metyo a eskrivir de muevo es un milagro :) Voz aviya dechado kon una resefta de Pesah esto aboltando kon una resefta de Pesah !!!! Todos konosen el « matzo ball soup » de los ashkenazim, ma vidi en el livro The Best Of Sephardic Cooking ke los sefaradis de Gresya aziyan esta supa tambien por el seder.

Kon beraha i salud

Albondigas de Matzo (Sephardic Matzo Ball Soup)

Ingredientes

- 4 guevos
- ¾ cupas de agua
- sal i pimienta
- 3 cupas de arina de matzot
- 6 cupas de kaldo de gayina
- 6 cupas de agua

Preparamiyento

- Batear los guevos kon la agua
- Adjustar sal i pimienta, i la arina de matzot para azer una masa
- Meter a reposar la masa una ora
- Despues de una ora, mojar las manos kon alzete i dar forma redonda a la masa
- En una cacharola, meter a buyir todas las cupas de kaldo i agua
- Kuando el kaldo buyo, echar las albondigas en el kaldo i las kozer una ora (o mas si las albondigas no son blandas)
- Kuando las albondigas son prontas, amatar el fuego i dechar reposar media ora antes de servir

Haroset

2007-04-02T09:29:00.000-07:00

Pessah Alegre a todos… Para mi Pesah no es Pesah sin Haroset. Me agrada komer el haroset ansina, kon matsa. Yay munchas rechetas de haroset, esto es el haroset de los Izmirlis. Se puede azer kon pasas sekas o kon kayisi sekos. Yo lo ago kon kayisi,hummm es una maraviya

Haroset

Ingredientes

2 kupa de mansana
½ kupa de datile
½ kupa de kayisi sekos
½ kupa de muez

agua

Preparamiyento

Meter agua enriva de las frutas

Buyir todos los ingredientes (sin los muezes ) fina ke se ablandan.

Pasarlos en el blender , i meter las muez pasadas

AJADA

2007-02-01T23:57:00.000-08:00

Ajada es una cosa maravilla. Se puede comer con carne, con pescado.

Es muy facil hacerlo. Tenemos de tomar una kavesa de ajos, 4-5 revanadas de pan blanko, medio fincan(de kafe turco) de limon, medya cupa de alcete, dos cucharas de cay sal. Todo se mescla con el mixer y esta pronta la ajada!

Koftes abafadas

2007-01-07T13:05:00.000-08:00

Oy es una resefta de los Istamboulis, ke topi en el livro de Deniz Alphan (ke ize muy bueno de merkarlo este enverano). Es una muy buena koza de kozer la karne molida de esta manera, me plaziyo muy muncho. Es una komida ke se kome kon arroz o patatas eskaldadas o fritas... humm... Espero ke vos va plazer.

Koftes abafadas

Ingredientes

- ½ kg karne molida
-2-3 revanadas de pan viejo
-una sevoya
-sal,pimienta
-alzete para freir

Preparamiyento

-Mesklar la karne molida, la miga de las revanadas de pan, mojadas i esprimidas, sal, pimienta i la sevoya rayida kon un poko de alzete.
-Masar muy bueno
-Tomar pedasikos de karne i dar forma de kofte
-En un paylon meter las koftes, echar un poko de alzete enriva i adjustar agua ( de manera a ver enriva de las koftes)
-Kozer fina ke buyi la agua, abashar el fuego. Kozer las koftes kon un ‘kapak’ –en turco (couvercle en fransez)-Aboltar las koftes de vez en kuando

Tarama+Cacik

2006-12-25T12:48:00.000-08:00

Keridos amigos,

El anyo muevo esta viniyendo, para oy vos do dos reseftas ke son muy fasil a azer i ke se puede azer para shabat, alegrias...Los diferentes puevlos de la Rusiya fina el Liban tiyenen una resefta de tarama o de cacik, es normal ke los sefaradim tomaron estos uzos de komidas.

Tarama es muy fasil, agora todo se puede merkar pronto. A mi me agrada maz el de kaza. Anios antes las mujer aziyan tarama en mano,oy kon los robotes es muy fasil :)
Cacik es una komida turka ke se kome en enverano,eskomo una supa freska.El de los gregos es maz espeso.

Espero ke vos va agradar.

Tarama

Ingredientes

-150 g guevos de pishkado (cabillaud)
-2-3 revanadas de pan
-Sumo de un limon
-Alzete

Preparamiyento

-Kitar la tela del guevo de pishkado
-Mojar la miga de las revanadas de pasn, la esprimir muy bueno
-Meter en un robot, i mesklar. En mesklando adjustar la alzete fina ke se aze komo una krema.
-Meter a yelar

Cacik (meldar djadjik -tzatziki turko)( En turkiya cacik es komo una supa freska)

Ingredientes

-Yogurt (500 g)
-Pipino (medio pipino fransez-2 –3 pipinos turkos)
-Sal
-Alzete
-Ajo (si plaze)

Preparamiyento

-Mesklar el yogurt kon un poko de agua i sal i ajo ahajado.
-Mundar el pipino i lo rayer en el yogurt.
-Mesklar
-meter un poko de alzete enriva
-Servir fresko

Burikitas de handrajo

2006-12-17T10:22:00.000-08:00

Komo vos dishe antes , para los burikitas, yay 3 maneras de azer burikitas. Despues de el gomo de patata oy vos esto dando la resefta de las burikitas de handrajo. Muestro handrajo es solo kon kalavasas, se puede azer tambien kon kalavasas i berenjenas. Aki mos agrada mas solo kon kalavasas. Es muy bueno para las kreaturas ke no komen verduras porke ,o entienden lo ke ay alientro de las burikitas !!!!

Burikitas de Handrajo

Ingredientes

Para la masa

-una kupa de alzete
-una kupa de agua
-sal
-keso raido ( komo parmesan)
-un poko de baking powder
-lo ke yeva de arina

Para el gomo

-2 kalavasas
-2 tomates
-2 sevoyas
-2 kucharas de keso raido
-un poko de sal
-un poko de alzete

Preparamiento

Para el gomo

-Rayer las kalavasas, los tomates i las sevoyas.
-Meter alzete en una kacharola, adjustar las kalavasas... rayidos, i meter a kozer en fuego muy bacho fina ke se azen komo una puree.
-Kuando el mesklado es yelado, adjustar el keso rayido.

Para la masa

-Mesklar l’alzete, la agua, sal, kezo raido, baking powder fina ke se aze komo una krema
-Meter l’arina i azer una masa no muy dura
-Tomar pisikos de masa del boy de una muez i avrirlos. Meter el gomo dar la forma de « croissant »
-Meter amarillo de guevo ensima la burikitaz
-Meter al orno

Revanadas de Parida

2006-12-03T08:55:00.000-08:00

Oy voz va a dar una resefta ke mi mama moz aziya kuando eramos chikos kada alha. Es muy savroso, kente kon asukar no ay mijor komida para la manyana !!!! El nombre de esta komida me agrada muncho : revanadas de parida :) es para dizir ke esta resefta no es para los ke azen diet !!!!

Revanadas de Parida

Ingredientes

-Revanadas de pan duro
-guevo(s)
-leche
La mesura es un guevo para kada kupa de leche

Preparamiyento

-Batear la leche kon el guevo
-Untar las revanadas en el mesklado. Dechar unas kuantas minutas fina ke se ablanden
-Las freir en alzete kente
-Servir kente kon asukar,kanela, miel,marmelade…..

Agristada

2006-11-26T08:09:00.000-08:00

Keridos amigos, agristada es kon vinagre lo ke se kome kon pishkado frito. Pishkado sin agristada no es pishkado. Aze muncha vezes ke deviya tomar la foto para meter en el blog ma es solo agora ke pudi meter la foto. Agristada es komo la mayonnaise de antes, i vinagre el ketchup ?:)

Agristada

Ingredientes

-una kupa d’agua
-una kuchara de arina
-2 guevos
-un poko de sal
-una kuchara o mas de limon

Preparamiyento

-Batear un poko los guevos en una kacharola, mesklar kon los otros ingredientes.
-Meter enriva del fuego i mesklar fina ke se aze komo una krema.
-Servir kon pischkado frito

Keskul

2006-11-12T13:29:00.000-08:00

Keridos amigos, ami me agrada muncho sutlac,keskul…todo lo ke se aze kon leche. En Turkiya ez una koza ke se puede komer en aziendo muestro shopping. Para los Izmirlis kon glasada de Mennan (en el carsi) es una koza maraviya

Keskul

Ingredientes

-1 Lt de leche
-3 kucharas (de supa) de arina de trigo (nisasta, fecule de maïs ….)
-1 kuchara (de supa) de arina de aroz
-3 kucharas de almendra mulida
-7 kucharas de asukar
-25-30 g manteka

Preparamiyento

-Meter el leche a kentar kon 7 kucharas de asukar
-Entre mientes mesklar l’arina de aroz i la arina de trigo kon un poko de agua.
-Kuando la leche buyi adjustar el mesklado de arinas, mesklar fina ke se aze espeso.
-Amatar el fuego, adjustar la manteka i mesklar bueno de muevo
-Vaziyar el keskul el los vazos-Meter al yelar i meter muez molida para komer

Garvansos

2006-11-01T04:55:00.000-08:00

Keridos amigos a mi me agrada muncho garvansos ma en falafel ;) ma falafel no es una komida sefaradi es por esto ke vo esto dando esta resefta. Garvansos es muy fasil a kozer i es una koza maraviya kon ‘bulgur’ u kon aroz. Es una komida muy savroza, espero ke voz va plazer tambien

Garvansos

Ingredientes

-una kupa de garvansos
-tomatada
-una sevoya
-alzete
-sal
-karne i kaldo de karne si keresh

Preparamiyento

-Meter en mojo una kupa de garvansos.
-La demaniana los eskaldar i echar la agua i los eskurir
-En una kacharola (tencere, cocotte…) sufreir la sevoya, kortada en pisikos
-Adjustar la tomatada, sufreir un poko mas.
-Meter agua (kaldo de karne si tenesh), meter los garvansos, la sal i kozerlos fina ke se azen blandos.

TOMAT REYNADO

2006-10-16T00:19:00.000-07:00

Con karne molida,sal, pimienta y pan mojado se hace köftikas y se inchi los tomates.
Se untan primero con arina y despues con huevo y se frien.
En un tifsin se mete agua bastante y se cose en el orno.
Con las coronas en las kavesas toman los tomates el reynado.

Biskutchikos-Rechikas

2006-10-08T13:41:00.000-07:00

Biskutchikos II o Rechikas

Yay mil i un maneras de azer biskutchikos, yo tengo 3 reseftas. Kada una viyene de una tia de mi madre. Ya vos aviya dado la resefta de la tia Sara , ke puedesh meldar de muevo aki, oy es la resefta de la tia Rashel. Este anyo las azimos para Yom Kippour para kortar el tanit, kon keso es una maraviya

Ingredientes

-125 g manteka blanda
-2 findjanes de alzete
-2 findjanes de agua
-una kupa de asukar
-1/2 paketo de baking powder
-arina
-susam (sesame)
-1 guevo

Preparamiyento

-Mesklar la manteka blanda kon l’asukar para azer komo una krema
-Adjsutar alzete i mesklar bueno, azer de mizmo kon la agua.
-Adjustar la arina i el baking para azer una masa no muy dura
-Dar forma
-Untar kon un guevo bateado i meter ‘susam’ enriva
-Meter al orno
-Se puedi guadrar en un kuti (komo tupperware) 2 semanas o mas

Gateau Salam

2006-09-24T12:28:00.000-07:00

Gateau salam

Keridos amigos, oy vos va dar la resefta de un ‘gateau’ ke se tope en kada kasa judia izmirliya, es el gateau salam. Oy es la resefta de los Izmirlis kon bitter chocolate, la proxima ves vo azer el gateau salam de los stambulis ke topi en livro ‘Dina’nin mutfagi’. La resefta de oy es la resefta de mi gramama (la madre de mi madre). Kuando era chika los aziyamos kaji kada semana, i kuando veniamos de la eskola komiyamos un pisiko de ‘salam’ :) Puedo dizir ke es el primero gateau ke izi-romper los ‘petit-beurre’ era mi echo !!!!

Ingredientes

-2 guevos
-250 g petit-beurre
-125 g manteka
-100 g bitter chocolate
-2.5 kucharas de kakao
-2 kucharas de asukar
-1/2 kupa de muez

Preparamiyento

-Meter la manteka i el bitter chocolate a dezazer en bain-marie.
-Kuando se dezazieron, meter kakao i asukar, mesklar bueno.
-Kuando la preparasiyon esta tivia, meter los guevos i mesklar de muevo
-Romper los petit-beurre en pisikos
-Adjustar los petit-beurre kon las muezis en la preparasiyon de chocolate.
-Vaziyar la preparasiyon en papel horno, i dar la forma de un salam
-Meter en el deep-freeze.
-Se kita unas kuantas oras antes de servir

Shanah Tova

2006-09-22T11:09:00.000-07:00

Vos dezeo un anyo yeno de pas, amor, salud... solo kosas buenas

Shanah Tova

Sarah

Filas

2006-09-10T12:50:00.000-07:00

En los tiempos pasados, las mujeres aziyan las filas en kasa. Es muncho lavoro para mujeres ke lavoran agora. Mersi al Dio puedemos topar nouilles, noodles ... para azer koma las filas de antes. Este enverano gusti en Izmir filas de kasa , porke agora en Izmir se vende filas de kasa, es otra kosa

Filas

-250 g filas (nouilles,noodles, eriste)
- agua
- sal
- 3-4 tomates (si no ay tomates se puede meter salsa de tomates)
-2 kucharas de alzete

Preparamiyento

-Meter las filas al orno, para tostar

-Rayer los tomates, meter sal,alzete. Meter à kozer fina ke trava l’agua

-Adjustar una kupa i media de agua. Kuando la agua se buyo meter las filas

-Abashar el fuego, i kozer fina ke las filas stan blandas

"Dina'nin Mutfagi"

2006-08-28T12:26:00.000-07:00

Keridos amigos,

Agora ke mi papu se esta aziendo mijor e ke yo me abolti de Turkiya, vo a kontinuar kon las historias de komida.
Ya savej ke muestra familia es de Izmir e ke mi mama giza las reseftas de los djudios deIzmir. Me agora vo tambien gizar ‘ a la mode’ de Istanbul, porke me merki un livro muy interesante ke se yama ‘Dina’nin mutfagi- Türk Sefarad Yemekleri’ (La cuzina de Dina- komidas de los Sefarad de Turkiya )de Deniz Alphan. Dina es la madre de Deniz, i en el livro yay reseftas komo dulse de igo, ke es una maraviya, lakerda, kashkarikas…..No se si el livro es publikado en inglez,fransez… ma seria un muy buena idea

Besos

Hola

2006-08-06T13:09:00.000-07:00

Keridos amigos,

Yay muncho tiempo ke no puedi eskrivir nada porke no teniya el moral muy alto. Mi papu estava al hopital en Izmir i mi madre i mi tia se fueron aya parar mirarlo. Oy mi papu esta mijor, i es yo ke me vo a ir en Turkiya!!!
Vo a demandar para muevas reseftas, puedeser ke me vo merkar un livro sovre la komida sefaradi de Izmir.

Besos a todos

sarah

VINAGRE

2006-07-06T14:34:00.000-07:00

Vinagre es una salsa que va muy bien con pescado frito. Y yo con las köftikas de pescado hace vinagre.
un findjan de kafe turco de vinagre
dos findjanes de agua
una azucar de terrones
una cuchara de consentrado de tomate
dos cucharas de harina
todo se mescla bueno y se mete a cocer, un poco de sal y pimienta se mete y si esta muy espeso se puede meter un poco mas de agua.
Quando esta pronto se mete de la alzete que freimus el pescado.

ATRAMUS

2006-06-30T23:07:00.000-07:00

Los Turkos yaman atramus 'avas judias'. Por mosotros atramus es para pasar tiempo, como pipitikas de karpuz (sandia). Antes las mujeres preparavan esto por schabat.
Atramus se mete al agua con sal y se aspera que se hagan grandes y saladas. Yo las tupi prontas en un frutero Italiano. Es bueno para pasar tiempo, y para la salut.

Mogados

2006-06-26T11:17:00.000-07:00

Oy vos va dar una resefta muy preciosa para mi. Tiene una larga istorya. En 1998 mi grapapa (no l’agrada ke lo yame papu) vinyo en Fransiya mos trucho una kuti yena de mogados ke le aviya dado Mme Alegra. Era la primera ves ke estava komiendo estas dulses. Kuando fuimos en Turkiya me fui a demandar a todas las tias de mi madre de dar mi las reseftas. La tia Sara i la tia Julia me dieron la resefta. Kiero rengrasiyar Mme Alegra i las tiyas de mi madre porke sin eyas nunka iva a oyir de este dulses.
Una koza ke fue una surpresa para mi fue de meldar ke en Fransya el biervo de las dulses ‘nougats’ vieni del biervo ‘nogado’.

En Izmir los mogados se dan en las bodas. Devesh dar a los mogados una forma spesial ke se yama kezada, i se dize enriva de las kavesas del novio i de la novia ‘kezada para ke kede bien kazada’ . Yo izi este mogados para la boda de un primo, mazal tov a los novios

Ingredientes

250 gr d'almendra250 gr d' asukar

Preparamiyento

Meter agua i almendras a buyir (un puko justo para poder mundar las almendras)
Mundar las almendras
Rayer las almendras kon un muliniko
En una kacharola meter l'asukar kon un poko d'agua (250gr d'asukar=mediakupa d'agua) a buyir fina el punto ( aser komo un elastik entro los dedos)
Echar las almendras mulidas
En fuego basho, kozer fina ke'el dip de la kacharola esta limpia ( no kozermuncho ke no se seke)
Deshar yelar un poko para no kemarse las manos
Masar kon la mano para azer una masa omogena( no se deve romper)
Dar forma de 'losange' .

Yaprakes falsos

2006-06-17T10:32:00.000-07:00

Yaprakes falsos

En Turkiya los yaprakes son una komida muy famosa i se azen kon karne mulida i arroz ma se puede azer solo kon arroz. Mozotros los azemos solo kon arroz es por esto ke se yama yaprakes falsos. Necessita muncho tiempo para azer este komida, porke duvlar kada una oja no es fasil !!! Este komida se puede komer en Gresya komo en Turkiya, ez una koza maraviya.

Ingredientes

-ojas de parra (250 g) –dechar 5-6 ojas de parra para la kacharola
-una kupa de arroz
-3-4 sevoyas
-1 tomate
-2 kucharas de alzete
-sal
-pimienta
-un poko de pirshil

Preparamiyento

-Lavar las ojas de parra i las buyir un poko para ke se ablanden.
-Eskurir las ojas.
-En un plato meter la kupa de arroz lavada.Rayer las sevoyas, i el tomate. Meter sal, pimienta , el pirshil kortido i la alzete i mesklar todo.
-Tomar una oja de parra, la inchir kon la preparasiyon. Duvlar kom un puro. Azer esto fina ke no kede una ojas de parra mas.
-Tomar las 5-6 ojas de parra ke deshates vaziyas, i las meter al dip de la kacharola. Enriva meter las ojas enchidas.
-Meter dos kupas de agua, un poko de alzete, sal, i medio limon esprimido. Meter a kozer kon un kapak (couvercle) a la reves fina ke se ablandan.

En Turkiya las ojas se komen kon yogurt

Sutlac

2006-06-03T12:34:00.000-07:00

Keriya meter esta resefta para shavouoth porke devemos komer dulses kon leche. Es una dulse ke me agrada muncho, el ke aziya mi gramama era maraviyozo.
Aki metemos las komidas sefaradi… i fin agora todas las reseftas teniyan nombre espaniol . Este dulse tiene un nombre turko , en turko sut kiere dizir leche. En Turkiya el sutlac ez arroz kon leche ma los sefaradim azen esto de doz maneraz, kon arroz o kon arina de arroz. El ke me agrada el maz es kon arina de arroz

Ingredientes

-1/2 litre de leche
-2 kuchara de supa de arina de arroz (crème de riz-pirinc unu)
-1 kupa de asukar
-Kanela

Preparamiyento

-Mesklar la leche, la arina de arroz i l’asukar en una kacharola
-Meter enriva del fuego, mesklar fina ke se aze espeso
-Amatar el fuego, mesklar para yelardo.
-Vaziyar en kupas
-Meter un poko de kanela enriva
-Se kome yelado

Guevos kon tomates

2006-05-28T13:02:00.000-07:00

De todas la kumidas sefaradi me parese ke esta resefta es la muy fasil a azer !!! Para mi el sekreto de esta komida es el asukar ke se mete si los tomates son asid.
En Izmir esta komida se aze espesialamente para Tesha Beav (la noche antes de tesha beav), no se kualo es la eksplikasiyon.
Antes de dar la resefta una poeziya de mi papu sovre tomates!!!

"Tomates tomates
a kuanto tomates
los tomates ke tomates"

Ingredientes (para 3 personas)

-6 tomates
-6 guevos
-sal
-un poko de asukar
-alzete
-un poko de kezo

Preparamiyento

-Mundar los tomates, los kortar minudos o pasar al robot
-Meter un poko de alzete en una ‘tava’. Meter los tomates a kozer fina ke se aze komo una pure. (Si los tomates son muy asid meter un poko de asukar)
-Romper los guevos enriva de la pure de tomates
-Mesklar los blankos kon los tomates i dechar los amarillos enteros
-Adjustar un poko de keso-Kuando los amarillos de los guevos son prontos servir

Mustachudos

2006-05-25T03:28:00.000-07:00

Keridos amigos a mi me agrada muncho almendras, muez… Es muy fasil para mi de komer kozaz savrosas :) La resefta de oy es una resfta muy fasil a azer i komer. Mi madre no keriya azerla porke su madre la aziya de una manera maraviyoza. Para esta resefta mirimos en diferentes livros (los de mi madre i uno ke mi ermana me diyo) Topimos dos variantes de esta resefta una kon almendra i la otra kon muez solo. Komo la tia Julia de mi madre lo aze solo kon muez los azimos de la misma manera. Esta resefta es la resefta de la Tia Julia ke es una muy buena gizandera i da la reseftas kon sus sekretos. Espero ke vos va plazer tambien

Mustachudos
Ingredientes

-3 kupas de muez molida
-1 kupa de asukar
-1 guevo
-1-1.5 kupa de ‘biscottes’ o matsot mulida
-Un poko de kanela

Preparamiyento
-Mesklar todos los ingredientes de manera a formar una masa
-Si la masa es muy dura se puede adjustar un poko de agua
-Meter la masa en un paylon, i la kozer a temparatura basha
-Tomar del fuego
-Deshar un poko yelar i dar formas
-Meter asukar en polvo enriva

Koftes de Pirasa

2006-05-21T12:12:00.000-07:00

Yay munchas semanas ke no teniya tiempo de eskrivir porke estava kon mi papu, ke vino de Izmir para vermos. Estavamos muy muy kontente de vermos. En akeyos tiempos no me olvidi el blog. Esto es una resefta muy savrosa ke mos agrada muncho. Espero ke vos va agradar tambien

Koftikas de pirasa (leak-poireaux)

Ingredientes
-250 g de karne mulida
-4-6 pirasas (leak –poireaux)
-2 patatas
-1 guevo
-1-2 kucharas de arina
-alzete para freir
-sal, pimienta

Preparamiyento
-Mundar , lavar, kortar las pirasas. Las eskaldar
-Mundar i eskaldar las patatas.
-Esprimir las pirasas eskaldadas.
-Azer una pure kon las patatas eskaldadas
-Mesklar karne mulida, pure de patatas i las pirasas esprimidas.
-Dar la forma de una kofte
-Untar las koftes primera vez en la arina i despues en el guevo bateado
-Las freir en la alzete kente

2006-04-29T04:19:00.000-07:00

FONGOS
La foto se fue sin asperar la resefta.
Es una comida que me gusta mucho y es muy facil de hacerla.
1/2 kilo de espinaca
2 huevos
100 gr keso rayido
4 cucharas de pan rayido
1/2 cupa de leche

2 patatas cocidas
1 huevo
1 cuchara keso rayido
sal

Las espinacas cortarlas fina.
Los huevos, pan rayido, leche y sal se mescla con las espinacas, y despeues se mete el keso rayido.
Se mete en una paila que es para el horno una cuchara de alzete y la espinaca pronta.
Las patatas cocidas, un huevo y el keso rayido se mescla bueno y con un poco de sal se hace una pure. Con una cuchara se mete bolas sobre da la espinaca.
Se descha en el horno por 40 minutos.

FONGOS

2006-04-29T04:10:00.000-07:00

Bimuelos de Amerika!!

2006-04-17T19:16:00.000-07:00

Bimuellos de Pessah

2006-04-17T07:41:00.000-07:00

Bimuellos de Pessah

Keridos amigos, Hag Sameah, Pessah Allegre a todos. En este tiempo no tengo muncho tiempo para eskrivir porke mi grapapa ke mora en Turkiya esta aki en Fransia. Ma no me plaze dechar mis lektores sin reseftas para Pessah. Esta es una resefta ke mi madre aze para kada Pessah.Kon miel es una maraviya

Ingredientes (para 5 personas)

-7 ojas de matsa
-7 guevos
-un poko de sal
-alzete para freir

Preparamiyento

-Mojar las matsa para las ablandar
-Las esprimir i las kortar en chikos pedasikos
-Mesklar kon los guevos
-Echar kucharas de la preparasion en la alzete kente

2006-04-05T12:32:00.000-07:00

Avikas con yaprak

Avikas con arroz es una comida nacional de los Turcos. Pero y en las casas judias se come con placer. No se por que los viernes hacia mi madre avikas con arroz y venia un pobre a comer con mozotros. Venia gritando "avikas y arroz David". Y a el tambien le gustava esta comida.

Pero a veces las hacia mi madre las avikas con yaprak. Era favorita comida mia, y hoy tambien.

un kilogramo de avikas

una cebolla

una cuchara de concentrado de tomate

sal, pimienta, comino

500 gr yaprak( hoja de vid)

carne molida

cebolla

sal, pimienta, pepermin

arroz

La carne molida, la cebolla, el arroz y la especia se mezcla bueno para llenar los yaprakes. En una pailla( tava) se frie de las dos partes.

Las avikas, con la cebolla y concentrado de tomate, sal, pimienta, comino se coce bueno y qundo stan blandas se meten los yaprakes.

Quando los yaprakes tambien stan blandos, es la comida pronta

Quanto de carne y arroz no lo soy, si es mucho hago otra comida que se llama "prisil y limon".

Kurabiye

2006-04-02T12:45:00.000-07:00

Kurabiye

Este biervo es un turco i es una koza dulse ke tiene muncha savor. Mi gramama aziya este dulse i agora mi madre le aze tanbien. Kurabiye kon un kafiko turco : humm es una koza maraviyoza.
No se kualo se puede dizir mas, solo puede dizir ‘aze lo’ :)

Ingredientes

-una kupa de alzete
-media kupa de asukar en polvo (sucre glace)
-una kuchara de tahina
-lo ke yeva de arena

Preparamiyento

-Mesklar asukar, alzete, tahina para azer komo una krema
-Adjustar la arina para azer una masa no muy dura
-Se da la forma de la luna (komo la letra C)
-Meter al orno th-1 fina ke se azen un poko duro
-Se mete asukar en polvo enriva

Bokadikos de Kalavasa

2006-03-26T10:31:00.000-08:00

Bokadikos de Kalavasa

Kalavasa es una koza kon kualo puedes azer munchas komidas, fritada, medias de kalavasas, dolmas de kalavas… me lo ke me agrada mas kon la kalavasa es ke en mismo tiempo es une biervo ke kere dizir ‘imbécile’ … chut este sitio es para dar reseftas i no embezar injurias :)
La resefta de oy es una resefta muy fasil a azer, i mi papu lo aze mijor de mi madre (no lo digas ke es yo ke vos embezo este sekreto de familia :) )
Los kes son de Istanbul azen una koza ke parese i ke se yama kashkarikas

Ingredientes
-2-3 kalavasas
-una kuchara de tomatada
-2-3 ajikos
-sal
-Pirshil

Preparamiyento
-Se munda las kalavasas
-Se korta komo un dedo
-Se mete en una kacharola
-Se adjusta un poka d’agua, sal, ajikos, tomatada i se mete a buyir
-Kuando buyi meter el fuego al minimum
-Kuando las kalavasikas son blandas, la komida esta pronta

Manuras

2006-03-18T08:53:00.000-08:00

Hay muchos que asperan Pesah para komer Matzot. Yo no puedo asperar. Me gusta alhad manana haser manuras por todos .
4 matzot
keso rayido
alzete de olivia
un huevo
Se mete a buyir 2 kupas de agua. Quando buyi se meti matzot fin que sazen un poco blandas.
Se meti en un plato i con alzete i keso rayido se traye ala meza. El huevo se buyi quatro minutos
i se meti enriva del matzot.

Travados de Amerika

2006-03-13T17:56:00.000-08:00

.

Los travados mios son muy delisioso. La resefta no ez de mi mama, la topi en un livro ke se yama The Best of Sephardic Cooking. El livro ez chikito ama yo puedi topar todas las reseftas de mi mama (bamya, biskochos, roksa etc.).

Azer travados ez longo ama Pourim ez un defaz en l'anyo!

Mi travados son muy ermozos (si si), porke meto muncho karamel!! M'agrada esta foto muncho :) A me Madre: tu ke penses de me travados?

Travados

2006-03-12T12:16:00.000-08:00

Keridos amigos,

A maniana es Purim, vos dezeo a todos un purim allegre. Para Purim kada anyo mi madre aze travados, yay parsonas ke yaman esto burikitas de muez. Purim es un fiesta de allegria para los djiyos. El dia de Purim se melda la megila de Esther ke es la historia de lo ke se paso entre Mardochée (Mordechai- en ladino yay palavras komo ‘azete de Mordechai’) , el rey Assuerus, Aman (ke keriya matar los djudios) i Esther ke salvo la vida de los djudios. Ay muncho de kontar ma me parese ke keres la resefta de los travados en primero :)

Travados

Ingredientes

Para la masa

-una kupa de alzete
-media kupa de agua
-kanela
-media kupa de asukar
-medio paketo de baking powder o baking ‘soda’
-lo ke toma de arena

Para el gomo
-muez mulida
-asukar
-kanela

Para el ‘sirop’
-una kupa de miel
-una kupa de agua
-una kupa de asukar

Preparamiyento

-Mesklar alzete, agua i asukar. Adjustar l’arina kon el baking powder para azer una masa no -muy dura.
-Tomar pisikos de masa, avrir kon la mano i meter el gomo, dublar en dos.
-Meter al orno
-Azer un ‘sirop’, pasar los travados en el ‘sirop’ kente. Echar una buyida, i kitaldos kon una kuchara para meter en un plato.
-Kuando todos los travados son pasados en el ‘sirop’, meter el ‘sirop’ enriva de los travados.

Pan d'Espagna

2006-03-05T12:34:00.000-08:00

Pan d’Espagna o Pan Espondjado

No puedo azer un blog de kumida sefardi sin meter esta resefta. Esto es un ‘classique’ de la komida sefaradi, i es muy fasil d’azerlo. En muestra kaza yay siempre un pan d’Espagna. Es una koza maraviya kon frutas i kon un kupa de leche humm. Deve ser la primera koza ke me embezi a azer en una kuzina. Lo ke es muy bueno kon este pan, es ke no yay alzete i baking powder. Es muy livyano

Ingredientes

-5 guevos
-3 findjanes de kafe turko d’asukar
-4 findjanes de kafe turko d’arina

Preparamiyento

-Batear los guevos
-Adjustar l’asukar i batear de muevo fina ke se aze una krema blanka
-Adjustar l’arina I batear mas
-Meter la preparasion en un paylon e meter al orno.

Burikitas

2006-02-26T12:44:00.000-08:00

Burikitas es un biervo ke viene del turco börek (ke es una masa kon gomo alientro). En mi famiya los yamamos burikitas, me se yaman tanbien burekas. Burikitas es una koza ke todos lo ke las komen keren komer mas. Yo las ago para las fiestas entre amigos i todos keren la resefta. Yay tres gomos posivle para los burikitas , uno kon handrajo, uno kon pure (ke se yama kezo i guevo) i un otro kon aroz . Oy es la resefta kon kezo i guevo ke vos va a dar. Una buena mujer sefaradi deve saver azer burikitas :)

Burikitas

Ingredientes
Para la masa
-una kupa de alzete
-una kupa de leche
-sal
-keso raido ( komo parmesan)-una kuchara
-un poko de baking powder
-lo ke yeva de arina

Para el gomo
-5 patatas
-2 guevos
-3 kucharas de keso raido
-un poko de sal

Preparamiento
Para el gomo
-Mundar las patatas i kortarlas en pisikos. Meter a kozer kon agua fina ke se ablandan
-Kuando estan blandas azer una pure
-Meter un guevo entero i el blanko del otro
-Mesklar bueno

Para la masa
-Mesklar l’alzete, el leche, sal, kezo raido, baking powder fina ke se aze komo una krema
-Meter l’arina i azer una masa no muy dura

-Tomar pisikos de masa del boy de una muez i avrirlos. Meter el gomo serar i kortar kon una kupa.
-Meter amarillo de guevo ensima la burikitaz
-Meter al orno

Kafe Turko

2006-02-19T12:53:00.000-08:00

En mis reseftas devezes vas a meldar la mesura ‘findjan de kafe turko’ . Oy tomi la mesura de un findjan es komo 1/3 cup.
Yo me embezi a azer el kafe turko kuando era muy chika porke mi padre se amorava de kafe turko. Su madre aziya el kafe turko i despues mirava el findjan ( es meldar el futuro en el findjan)
Este kafiko es muy importante kuando ay vijitas. Se aze siempre un kafiko kon una koza dulse al lado. Los biskutchikos kon el kafiko azen un muy bueno ‘duo’ porke puedes untar los biskutchikos en el kafe.

Oy voz vo dar mi resefta de kafe turko

Para una kupa (findjan) de kafe
-un kupa de agua
-media kuchara de kafe (el kafe para el kafe turko deve ser muy muy fino)
-asukar (si kieres)

-Meter l’agua il el asukar a kentar
-Kuando l’agua se kento meter el kafe. Mesklar fina ke se aze un krema enriva. (el fuego no deve ser muy fuerte) Tomar de la krema i meter en el findjan.
-En le fuego kontinuar a mesklar un poko
-Kuando el kafe empesa a buyir amatar el fuego
-Meter el kafe en el findjan

Saludozas

2006-02-12T12:49:00.000-08:00

Agora yo se, komo demandar kumidas sefardis a mi madre : ‘mama para el blog seriya bueno de azer boyos, saludozas, mogados…’ Ansina mi madre no puede dizir ke no tengo gana de kuzinar :)
Oy fue el torno de las saludozas, ke las mijor son las saludozas de Tante Julya (la primera vez ke komi saludozas estava en Cesme en su kaza ) Es una masa de pan kon un gomo de karne, mi madre dize ke es posivle de azer kon un gomo de kezo tambien.

Ingredientes

-Arina (mas o menos 500g)
-Levadura (20g)
-sal
-Agua

Puedes merkar una masa de pan pronta

Para el gomo
-250 g karne mulida
-una sevoya
-sal
-pimienta

-Alzete para freir

Preparamiyento
-Deritir la levadura en un poko de agua tivia
-Mesklar kon la arina i la sal, meter agua tivia. Lavorar la masa fina ke no se apega en las manos.
-Meter en un lugar kente para ke la masa s’alevanta

Para el gomo
-Kortar la sevoya minuda
-Sufreir un poko en la alzete
-Meter la karne molida
-Sufreir un poko mas
-Meter un poko de agua, kuando no ay mas agua la karne esta pronta

-Tomar un pisiko de masa, avrir la masa kon la mano. Meter un poko de gomo sovre la masa i serar komo una boreka.
-Freir en la alzete

Biskutchikos

2006-02-05T03:46:00.000-08:00

Entre las komidas sefardi ke ay siempre en muestra kaza yay los biskutchikos. Yay munchas reseftas de biskutchikos, yo tengo tres resftas de biskutchikos. Una para kada tia de mi madre :) La resefta de oy es la resefta de la tia Sara de mi madre. Mi amigos, ke no son sefardi, senamoran de estos biskutchikos. Kon una kupa de leche, kon kafe turko i un poko de keso es una koza maraviyoza. Agora me agrada muncho de komerlos kon keso blanko o kon kezo de chèvre(goat) ke no se kualo es el ladino de este biervo!!!
Komer kumidas sefardi kon musika sefardi es un grande plazer, es por esto ke miti la kaseta de Janet i Jak Esim en la foto. Komo dizen los turkos es ’ keyif’

Biskutchikos

Ingredientes
-2 guevos
-1 fincan de kafe turko de agua
-3 fincan de kafe turko de asukar
-3 fincan de kafe turko de alzete
-Arina
-una kuchara de baking (10g)
-un paketo de vanilya

Preparamiyento

-Los guevos kon l’asukar se bateyan muy bueno
-Kuando se aze kom una krema se mete alzete i agua. Bateyar de muevo
-Despues meter lo ke toma de arina, baking i vanilya
-Azer una masa no muy dura
-Se da forma de chikas karusas
-Meter al orno

Dulse de Bimbriyo : La Resefta

2006-01-28T10:17:00.000-08:00

Ya se ay una semana ke meti en el sitio la foto del dulse de bimbriyo, e yay una semana ke estas asperando esta resefta. La resefta de bimbriyo es una resefta ke se merese :)
Mi gramama aziya un dulse de bimbriyo delisioso. Kon mi ermana eramos muy chikas para demandarla las reseftas ke aziya , i kuando fuimos en edad de demandar las reseftas se murio. Esta resefta es de la gramama de mi mama ke era de Tiria. Kon este mesura es siguru ke vas a reushir.

Dulse de Bimbriyo :

-Mundar los bimbriyos i kortarlos en pisikos chikitikos
- Los eskaldar poko a poko
-Kuando estan blandos, kitaldos de la agua i los eskurir.
-Azer una pure kon los bimbriyos blandos

-Para una kupa de pure se mezura una kupa de asukar
-Meter a kozer, fina ke se espesa.
-Se mete en un paylon i se desha a sekar

Esto es la hadra :)))))

Dulse de Bimbriyo

2006-01-22T11:56:00.000-08:00

Keridos amigos, esta semana no tuve tiyempo para meter kozas muevas en el blog, ma tomi la foto del dulse de bimbriyo ke mi nona aziya e ke komiyamos kada anio en Izmir. Agora lo ago kon mi mama, porke mi papa metio un arvol de bimbriyo en la guerta :)

Vo kontinuar kon la resefta en pokos dias

Fritada de Kalavasa

2006-01-15T08:41:00.000-08:00

Keridos meldadores,

Kontuniando a dar mis sekretos, los reseftas son verdaderos sekretos de familia :), vos vo a kontar la resefta la mas fasil de la kultura sefaradi, la fritada (ke me parese ke se yama almodrote en Istanbul)
Ay muncha manera de azer la fritada, de kalavasa, de pirasa ke se yama prasifuchi, de espinaka… Ay una koza muy kurioza. Tenemos una amiga de Adana ke aze kozas muy paresidos a la kuzina sefaradi de los Izmirlis. Entre otras kozas ayi azen una kumida ke parese muncho a la fritada, ma se yama ‘mücver’ (en turko) i es chikitiko i se frien

Oy la resefta de la fritada de kalavasa

Ingredientes

-500 g kalavasa
-3 guevos
-la miga de 2 revanadas de pan seko (si no tenesh pan puedes meter 2 kucharas de arina)
-sal, pimienta i ‘pirsil’ (no se kualo es el biervo)
-Kezo rayido

Preparamiyento

-Se munda i se rayi las kalavasas
-Esprimir la agua de la kalavasas
-Las kalavasas esprimidas, se mesklan kon la miga del pan (un poko mojada i esprimida), los guevos, sal, pimienta
-Se mete en un pyrex kon un poko de alzete, se vazya la preparasyon de kalavasa. Enriva se mete kezo rayido e se mete al orno.

Afiyet Olsun :)

Dezazer o Derritir?

2006-01-11T12:39:00.000-08:00

Mis reseftas son todas eskritas en turko o en fransez, solo el nombre de la resefta es en ladino. Para ke se entendya bien demandi a mi mama komo se dize este biervo o este vierbo en ladino, a kada biervo ke eskrivio lo demandi si ya se puede entender lo ke estava eskriviendo.

Kuando estava eskriviendo la resefta le vino al tino de mi mama ke se diziya dezazer para la manteka. Ma nunka oyi este biervo, lo meti en la resefta i despues me dichi, deke no mirar en un diksonario ??? Topi el diksyonario elektroniko i tomi el diksyonario de Joseph Nehama e empesi a bushkar…

Ke surpreza kuando meldimos kon mi mama ke la manteka se derriti e no se dezaze !

Me parese ke me va ambezar munchas kosaz …

Sarah

Roska

2006-01-09T11:57:00.000-08:00

Para mi primera resefta kiji meter una kosa dulce i ke me plaze muncho : es la roska. Me parese ke la roska es una spesialita de Izmir. Yo tengo 2 reseftas de roskas, la una de la tia Sarah i la otra de la tia Julia de mi mama. Oy vos eskrivo la de la tia Julia. Tomi munchas reseftas de las tias de mi mama, e oy me alegri de aver tomarlas :)

En Izmir la roska se komiyava kon kezo blanko i se aziya noche de shabbat i se embiyava al banyo de la novia de parte de la esfuegra.

La Roska de tante Julia

Ingredientes

-42 g levadura
-media kupa de asukar
-60 g de manteka (dezazida)
- lo ke toma de arina
-una kupa de leche
-Kanela
- un guevo para la masa i un guevo para meter enriva

Preparamyento

-En primero meter en un plato ondo la levadura kon 2 kucharas de arina, una kuchara de asukar, un poko te sal i una kupa de agua tivia. Mesklar i dechar en un lugar kente medya ora.

-Kuando la levadura esta pronta mesklar la levadura kon la manteka, l’asukar, la kanela, el guevo i la leche tivia. Meter l’arina para azer una masa no muy dura.

-Meter en un lugar kente para ke la masa se alevanta.

-Kuando la masa se alevanto, lavorar la masa de muevo i dar la forma de un ‘simit’ grande.Dechar reposar de muevo (media ora)

-Despues de media ora pasar el guevo enriva i meter un poko de ‘susam’
-Meter al orno 25-30 minutas

Si ay personas ke tiene otras reseftas de roska puedes eskrivir las en la parte de komentaryo

Para empesar: saludos de Fransia

2006-01-08T10:05:00.000-08:00

Keridos amigos,

Esta maniana meldando los bloges turkos i fransez de mi ermana me dichi deke no avrir un blog en ladino para amostrar a todos ke muestra lingua esta biva. Para mi una lingua biva es una lingua ke se avla kada dia, gizando, kuando estamos iniervosos …
Komo mos agrada en la familya gizar, komer… es por esta razon ke avri un blog de kuzina ke se yama Savores de Siempre. Kero meter, entre otras kosaz, las reseftas sefaradis ke tengo de mi mama, tias …

Si ay personas ke keren aventurarse en este projeto son buenvenidas

Sarah

PS : siguru va a tener yerros in mis eskritas, de agora pardon.